BƏMEDƏMON? BƏMEDƏMON!
70-minnə sorbe, azən Sibirədə əskərbim, yəne sərbozəti kardedəbim, kəyku bo Nəvuzə idi bomı qıləy “pasılka” ğandəşonbe, şem poçto ə “pasılkə” peqətıme, oməym bə “çast”, bəştə koy vırə, bə koçeqar, tolışi bə koçeqari çiç votedən – zınedənim, tırkon bəy qazanxana votedən, ha, həminə koçeqarədə demı Saşa nominə qıləy zardəquş (əres, orıs, urus – red) ko kardedəbe. Əlğərəz, posılka okardımone, xəyli şini – bıxi, çanquri, paxlava hestbe, ve həyf ki, ə şinion həmmə xərob bəbin, kali qılon lap kavubin, ə şinion domone bə xuqon, posılka dılədə qıləy kasetən hestbe, maqnitafoni kaset, çəy səpeən nıvıştə bəbe “Azərbaycan muğamları”. Kanə merdon zınedən, bə vaxti bə mahne quş doy jəqoən hostonə ko nıbe, elm, texnika bənəy ısətnəni səviyyədə nıbe, mılxəs, az de Saşa şemon bə hardəxonə, vəy ozbəqon ko kardedəbin, çəvonən qıləy maqnitafonşon hestbe, az kaseti dome bə ozbəqi, əvən ə kaseti noşe bəştə maqnitafon, muğamat bino be, handəkəsi nom çımı yodədə ni, əmmo əy zınedəm ki, təsnifi “bəm” avazi səpe muğamat handedəbe. Yurdumardəy zoə koncosə 7-8 dəyğə “bəm”əy, azən arada bə Saşa votedəm ki, ısət mahne çokə vırə bome, əmmo “bəm”e sə bedənıbe ki, bedənıbe. 10 dəyğə təmomədə Saşa mıku parsəy:
– Он долго будет плакать? (əv ve bəbəme?)
Bə Saşa cəvob nıdome, əmmo ıştən bəştə votıme ki, veyən təsnifi nom “bəm”e, odəmən ənnə bəbəme? Mılxəs, kaseti dome bə ozbəqon, de Saşa oqardim bə koçeqar. Peşo bə kə nomə nıvışteyədə bəvon aspardıme ki, i kərəən bomı muğamata kaset məvğandən…
Məvuji çı diyəroku bino kardıme, sıxani vardıme bo bəme. Sıftə əy bıvotom ki, bəmı jıqo omedə ki, təsnifon nomon həmmə bə tolışiye – pəs, bəm, şur, zil, duqah, seqah, çaharqah… İsror kardedənim, əmmo bəmı jıqo omedə ki, muğamat çı tolışi fərhənqi məhsule. ələxsusən “bəm”…
Bəmeyədə ustomon, hiç millət bənəy bəmə bəme zınedəni, arada bəmedəne, əmmo bənəy tolışi bəme zınedənin…
Umumən tolışi fərhənqi məhsulon veyin – qofe, dizə, tımon, qıliyə, osınə, zərqərə məhsulon, kiyəsə patəyon, bicara mahneon… Ve təəsuf ki, ım məhsulon veyni çəmə dasto beşən, benışəqılonən qədə-qədə beşedən… Boçi bəpe jıqo bıbu? Boçixo, boçi? Əmə bəştə zıvoni asimon, bə hisob? Ne, bə hisob be əzıni, çumçiko hələ əhli Lankon sıvoy tolışi co zıvon nızneyədə Muslum Maqomayev de Uzeyir Hacıbəyovi omedən bə Lankon, çəmə bicarə nəğmon bə not səydən, ə nəğmon deəyən çəmə dasto beşedən. Isət əmə voteyədə ki, “Arşın mal alan” iyən “O olmasın, bu olsun” filmon musiqi çəmə bicarə nəğmonin, bəmə sıredən, votedən ki, çı tolışon iqlə mahneşon heste, “kələm gül açdı”, əçəyən sıxanon bə tırki…
Şah İsmayıli qıləy bobo Şeyx Səfi bə, qıləy boboən Firuz şah Zərinkılo, har dıqləni tolışe, əmmo şah İsmayıl tolış ni, eynən Mubariz Mənsimovan bə rujədəy. Yurdimardəy valideynon tolış be be votedə ki, az tırkim. Hələ çəmə deputaton… Statistika komitə votedə ki, Milli Məclisədə i kəsən bıbu tolış ni, şımə isror bəkardeşon ki, heste? Hələ bəvoteşon ki, ay çıbıznom Milli Məclisədə 5-6 tolış heste, ay çıbıznom fılon həkim-deputat, ay çıbıznom fılon biznesmen-deputat tolışe? Şımə statistika komitəku ve zınedəşon? Ni, dədəma, nə Milli Məclisədə, nəən co orqanonədə tolış ni, əvonən bənəy Mubariz Mənsimovi qardən, bən bo tolışi dışmen…
Əmə iqlə bo bəme çokimon, bəme-bəme, iyəndı po jintoni kande-kande şə millətimon, bəvoteşon ki, sıvoy tolışi co millətonən bəmedən, bəle, bəmedən, boştə ruji bəmedən, ruji, əmə ısət boy bo co milləton ruji bəmedəmon, ım bə çiçi oşedə? Jıqo bızın çəmə mard mandə 4 ro miyonədə, əmə bo bəme bo co mardi nəvedəmon…
İyəndı vindedəmon, dəmandəmon bəme, çıbıznom rujqar qone, puli rosne bedəni, olət səy bedəni, 3 manqe iqlə maşini romedəm, əy dəqiş karde zınedənim, çı boği hıvosi kardəkəsi maaşi rosne zınedənim, mılxəs, rost-du bo har çi bəmedəmon, iqlə boştə milləti ruji, boştə zıvoni ruji bəmedənimon, bə zıvoni, bə milləti rəseədə çəmə çaşon bənəy çəmə cifi “hışk” bedən, i tılə ars ru bedəni ki, bedəni…
Bı milləti sə har çi dəşedə, iqlə inə zıvoni, moə zıvoni qin be məsələ dəşedəni, ənnə bəməmon ki, mazqmon hışk bə…
Atabala BABAYEV
Boku
Rafiqibloq 