“DƏJƏ DİM”

“DƏJƏ DİM”

Ə ruji bə kə omedəbim, hejo çı lifto beşem, vindıme çəmə hamsiyə jenon beşən bə qəvə tasıb, qıləy hamsiyə bə iqlə votedə ki, “ıştə kəy leşti (zibili) çəmə kəybə vədə mənə, ıvrə botı sələfu ni”, ə iqləən votedə ki, “az ıştə kəy leşti ıştə kəybə vədə noydəm, bətı çiç?”, mılxəs, ımon kam mandən i yəndı muon orındınon, iberdəmədə ə leşti noə jen bə iqlə jeni votışe ki:

– Ağəz, adam kişi olar, sözün var, söz danış…

Ə iqləən hiç bo cəvobi nınəvəy, cəvob doşe ki:

– Azzz, sənə kişi lazımdır?

Hejo bı dəmədə çəvon dıynənən çaş qarde mısə, qıləy pıqqə jəşone, dəşen bəştə kəon, həni ə leşti tasıb demiyən sə be…

…Sərredaktor zanq kardəşe ki, “Atabala muəllim, rujnomə bə dərc hozı bedə, zəhməte, qıləy nıvıştəy bınıvıştən, şımə pərəstişkaron ənnə çımı nıvıştəy handedənin, ənnə şımə nıvıştəy handedən”, piyəme bıvotom ki, dekabra manqədə 11 sor be ki, az bı rujnomə nıvıştedəm, bı 11 sorədə hiç 11 kopikən qonorar səm ni, nibənıvıştem”, əmmo qəvım lol bıbu, votıme “bə çaş”, ısət şəm bə çort – çiçiku bınıvıştom? Çəyku bınıvıştom ki, 17 sore tolışi dərsə kitobon çap bedənin? Çı kitobon həxədə qəp jəkəs veye, jıqonəən bəmı kitob lozime? Çap bedənin – bedəninəni, bəmı çiç? Ehanə çap be, ya çap nıbe – çiç dəqiş bedə? Muəllim heste ki, ə dərson dəvono? Muəllim nixo, ə kitobon bəki lozimin? Bəvoteşon ki, “kali məktəbonədə muəllimon rujnomə-jurnalonku, şeirə-nəğılə kitobonku bo əğılon dərs dəvonyedən, əy vindəniş?”, bəle, azən rozim ki, kali ğıyətmandə muəllimon bo vonə nəvedənin, bəçəvon dast kitob eqınyi, rujnomə eqınyi – tavutuş ni, tolışi zıvoni dərsi dəvonyedən, əmmo kali binamusa muəllimon hestin ki, bəvon çənnə dərsə vəsait bıdəşən – xəyrış ni, əvon bə hırdənon bəvoten ki: “ədə, bu dil kimə lazımdıye, gedin futqol oynayın”, ne, az futboli səhv nınıvıştme, ə besəvodon jəqo votedən. Bə hisob kitobon dərciku ənıvıştnim, yəne nibənıvıştem. Çı kitobonku nınıvıştom, bəvədə çiçiku bınıvıştom? Ha, rujnoməku bınıvıştom, bepulətiku rujnomə fevralə manqədə benışe…, zə, i dəyğə lol bıbi, bətı çiç omə rujnomə havari kəşedəş? Zə, axmaxa odəm, rujnomə beşe, ya benışe – botı çiçsə dəqiş bedə? Qavar bətı qonorar doydən, xəbəmon ni? Zə, rujnomə fevralədə benışe – çımı pə lınqonsə benışe, çimi fikriyən az bıkəm? Hiç martədən benışo, aprelədən. Çiçe, çəmə ərbobon mardən, ya ğır bən? Əvha, Mubariz Mənsimov bo Firudin Cəlilovi, zə, ə yurdimardəyən Cəlilove, sponsorəti kardedə, əçəy “bitik-mitik” kitobi çap kardero 100 həzo dollarisə ve pul xarc kardedə, əçəy havari kəşedə, çiçe, bo rujnomə 100 dollar ğande zınedəni? Firudin Cəlilov votıme, bəçımı yod əçəy qıləy kitob dəşe, yurdimardəy çı kırdon Koroğlu kardəşe Goroğlu, yəne ıştənki. Mubariz bo Firudini 5-6 sorən sponsorəti bıkə, diyəkəyşon, ə Firudin inqilisonən, lemesonən, firənqonən tırk bebəkarde…, ehanə benıkardışe bəvədə bəmı bıvotişon ki, “ay Atabala, tı çı əvomə insoniş”… …Zə, bəmı rujnomə lozime? Ne, bəpe co çiku bınıvıştom. Yəne çiçiku? Qavar çəmə kali dionədə ğazi nibeku bınıvıştom? Bınıvıştom ki, ğaz ni, vişon ğır bedən, ğır neye, lap tuməbır bedən…, neye zə, çımı mamazoə Ostoro vişə idorədə çokə vəzifədəye, bəy xələl bome. Bəvədə vişəku nınıvıştom, çəmə Kaspi dıyoku bınıvıştom, bınıvıştom ki, Kaspi dıyo moyon brakanyeron kırnedən bə vıjor, dıyoədə moy mandə ni… Neye zə, çımı avlodi zoə bə dıyo nəzarətədə ko kardedə, yətim tojə penco həzo doəşe, ıştəni roxniyəşe, ne, dıyokuən nıvışte əzınim… Bəvədə çiçiku bınıvıştom? Qavar bə tolışi navədə şəkəson peyarış bıkəm? Im jıqonəən dəbədəye, odəmeye bear-bear bəvon pepuşyedə, pearış kardedən. Azən bənəy bəvon bıvotom ki, bı 30-35 sorədə çiç kardəne bo milləti? Əla, pəydo kardıme… Neye zə, iberdəmədə çəvonədə i kəs oqarde, votışe ki, “ay Atabala, bəs tı çiç kardə bo milləti?”, lol əbınim? Ne, əyən nıvışte, vote əbıni, odəmədə tikəy abur-həyo çokə şeye, nohəxə qəp odəmi dimi bədojne…

…Əmmo diyə kardedəm kali merdon bənəy çımı hamsiyə jenon bə qəv oməy votedən, əmmo çəvon dimən hiç dəjedəni…

Atabala BABAYEV

Boku

“Tolışon Sədo” N: 152